Rom 2 | MHL | STEP | Aria oko-ke feenap mainon-na, “Eliwa, Mua Maneka wi mua sira samora onimik nain wia samorinok.” Aria no naap me mae, no nena pun pina sira naap nain onin, naeya nos pun opora-pa ikainan. Moram mua oko wia mekawin nain sira nain-pa nena pun opora-pa name wuin.

Romans 2

Mua Maneka sira makena ookap yia mekawinon

1 Aria oko-ke feenap mainon-na, “Eliwa, Mua Maneka wi mua sira samora onimik nain wia samorinok.” Aria no naap me mae, no nena pun pina sira naap nain onin, naeya nos pun opora-pa ikainan. Moram mua oko wia mekawin nain sira nain-pa nena pun opora-pa name wuin. 2 Maa nain ariman, epa kilala-pa ikua. Mua Maneka wi mua naap onimik nain baliwep wia pupep pina wiar mekawiya, nain eliwa-ke. 3 Aria wi mua oko pina oniwkin wia mekawin, nain no nena pun wi pina onimik naap nain onin. No feenap main-i, Mua Maneka yo me efa samorinon, no naap main-i? 4 Ne maa oko pun feenap, no sira samora oneya Mua Maneka iiriw nefa samorowa nain me nefa samorak, ne o manek akena nefa kemalep nefa saliwowa maek. No kema-ko kire naep nefa urufiya-na weetak, no maa nain oram-ke wiar nain. Nain kema-ko me wuin, aa-na kema-ko kirekan.

5 Yo feenap mainen, no mua woos reenowa-ke, naeya no kema kirowa miatinin. No naap onami nena pina nain manekarow-ikim-ikain. Naapeya Mua Maneka bagiaw maneka wiar urufinan. Fofa eena wi mua baliwep wia mekawap wiena sira samora-pa wia samoriya nain no makena urufinan. 6 Mua Maneka eena wi mua sira kamenap onam-ikaimik nainiw wia kiripominon. 7 Feenap, wi mua papako feenap maimik, Mua Maneka eliwa yia naemi unum maneka yiinok, ne umep wiimar iikirimik nain anane ikaiyen. Wi nain naep kekelka ikok sira eliwa onam-ikemik. Naeya ikoka Mua Maneka-ke wia saliwami ona wameiya-pa wia wueya anane eliwa naap ikaikuan. 8 Ne wi mua papako yamunsiarep yo yaisow naemi opor makena me ookowa, sira samora naap onam-ikaimik. Wi nain ikoka Mua Maneka bagiaw wiar urufap sirirowa aawikuan. 9 Wi nain iiwawun pina aawikuan, ne kema pun samorarikuan. Makena, wi Yuuda-ke ikoka naap arikuan, ne wi murarowa-pa owow oko oko pun. 10 Ne wi mua sira eliwa ookimik nain, Mua Maneka-ke ni eliwa-ke wia naep unum maneka wiemi kema eliwa wiinon. Wi Yuuda naap wia oninon, ne wi murarowa-pa owow oko oko pun. 11 Moram Mua Maneka wi Yuuda ne wi owow oko oko pun wia rookasowa marew, mua unowiya iiwawun epaskun maneka wia naiya.

12 Wi owow oko oko Moses sira wuomakek nain me amisaremik, ne Mua Maneka-ke Moses sira nain maemi me wia mekawinon, weetak. Nain wi pina onimik nain ookami makena wia mekawinon. Ne Mua Maneka Moses opaimika-pa wi Yuuda sira wiomakek, nain wi nain me ookowa, pina onikuan-na o sira nain ookap wia mekawami wia samorinon. 13 Moram wi mua Mua Maneka sira wuomakek nain oram ifana-pa miimimik nain, Mua Maneka-ke feenap me wia nainon, “Ni mua kaken eliwa-ke,” naap me wia nainon, weetak. Mua Maneka sira wuomakek nain wiar miimap ookowa nain-ke makena, Mua Maneka ni mua kaken eliwa-ke wia naiya. 14 Ne wi owow oko oko wi Moses sira wuomakek nain me amisaremik. Nain wi maa kema suuwap anane sira eliwa naap onam-ikaikuan-na wi Moses sira wuomakek nain pepek arowikuan. 15 Sira kamenap onimik nain wiena kema-pa maemi Mua Maneka sira wiar amisarowa saarik arep sira eliwa naap onimik. Ne pun wiena kema-ke naap maimik, “Yo sira eliwa onam,” e “Yo sira samora onam.” 16 Ne aria yo Yeesus opor eliwa anane nia maakemi maiyem, feenap, maa unowa nain ikoka Mua Maneka ona fofa pepekimok neeke Yeesus Krais wapena-pa wiar wueya wi mua kema-pa maa pipilimemik nain ariman wuami wia mekawinon.

Wi Yuuda Moses sira baliwep ookeka wia maakek

17 Ne ni Yuuda, ni feenap maiman “I Yuuda-ke, i Moses sira wuomakek nain ookimik, ne Mua Maneka i iisow yia aawok.” Ni naap maemi unuma niam piriman. 18 Ne Mua Maneka maa mauwa onowa nia naiya nain wiar amisareman. Naemi Moses sira wuomakek nain amisarep sira kakeniw ookap eliwa-ke naiman. 19 Ni wi owow oko oko feenap wia maiman, “Wi mua mokok opa saarik Mua Maneka me amisaremik. Naeya is-ke wia maakemkun wi parinarep amisaruk.” Ni uuwowa naap niam naiman. 20 Ne wi woosa baliwep me kema suuwimik, ne wi takir kema saarik ikemik nain kema wia fooku naep oniman. 21 Wi owow oko oko suule wiiman, ne sira unowa nain niena-ko me ookiman-i? Ni feenap wia maakiman, “Mua oko maa me wiar ikum aaweka,” naap maep-puap niena eliw ikumarowen-i? 22 Ne wia maakiman, “Mua oko emeria me wiar mufeka.” Naap maep-puap niena pun uruw mia niam kaikiman-i? Wi mua miira sirarep inasina arowimik nain wia miatiniman, nain ni sirin koora wiar ikiwep maa wiar ikum aawowa eliwa-ki? 23 Aria ni feenap, niena unuma niam pirami maiman, “Moses sira wuomakek nain i amisaremik, yiena yiarik,” naap maiman. Nain ni niena sira maneka nain puukiman. Ni naap onami Mua Maneka emina me ururowowa nain emina ururowiman. 24 Ni sira-sira naap oniman. Naeya opora iiriw Mua Maneka maek nain pepek akena nia maek, feenap,

“Ni Yuuda muuta nain wi owow oko oko-ke Mua Maneka unuma iiwawun wiar poraimik.”
(Aisaiya 52.5, Esekiel 36.22)

Mua Maneka opora wiar ookowa nain maa maneka-ke

25 Aria ni Mua Maneka sira baliwep ookowen-na mia kanima puukaman nain niam ilenap ikowen, i Mua Maneka teeria-ke naep. Ne ni sira puukowen-na ni mia kanima puukaman nain Mua Maneka mokoka-pa oram saarik ikowen. 26 Wi owow oko oko, mia kanima me puukimik, nain wi Mua Maneka sira baliwep ookikuan-na Mua Maneka mokoka-pa wis-ke mia kanima puukowa saarik ikaikuan, maken-i? 27 Ni Yuuda-na, ni mia kanima puukowa-ke, ne sira Moses iiriw niomakek nain ni niena sira nain puukiman. Ne wi owow oko oko, mia kanima me puukimik, nain wi mua papako Mua Maneka sira baliwep ookimik. Neeke wis-ke nia urufap nia maikuan, “Ni Mua Maneka sira amisareman, nain niena sira nain puukaman,” naap nia maikuan. 28 Moram ni unuma muutiw i Yuuda-ke niam naiman nain ni me kakeniw Yuuda-ke nia naiyem. Ne mia kanima puukowa nain pun me mia muutiw maa-ke, weetak. Mua wia ilenowa-ke. 29 Mua o Yuuda kakeniw-ke wame nainok naep-na o woosa ne kema tepak iiwawun Yuuda mua ikok Mua Maneka sira baliwep ookinok. Ne mia kanima puukowa onoma pun naap, me kae sira muutiw ookami puukimik, weetak. Mua Maneka sira baliwep wiar ookami ona teeria wiar ikainok. Nain ona Ewar Eliwa-ke wia asipam-ikaeya wi naap onimik. Naapeya wi me mua fain-ke unum maneka wiimik, weetak. Ona Mua Maneka-ke unum maneka wiinon.